Kapelke, Catsop (Foto Wim Hanssen)

Catsop wo ich gebaore bèn. Wo ’t auwershoes nog steit.
’T koos waal ein teks van ein leedje zeen, die gedachte veel mich in toen ich op eine sjwanne zonjigmörrege baove op de Knup euver Catsop heen keek. ’t Laok van Aelse zagte ze vreuger. Mèr es ich zwa öm mich bie kiek , de rös om mich bie veul en de boereloch opsnoef. Dan dènk ich wie höb ste hie kènne weggaon , Aelse is waal neet zwawiet weg, mèr de wèrs toch neet mjèr debiej.

Catsop is toch waal ein hechtere gemeinsjap es Aelse, temminste zwa veul ich dat. Veurig jaor 150 jaor kapelke , toen merrekte ste pas wat ein hechte gemeinschap beteikent. Ein processie zwa wie vreuger , same aete zwa wie vreuger , auw herrineringe ophaole euver vreuger.

Op de Knup, Catsop (Foto Leo Everard)

Es kèndj vossejage in ’t veld, mit de Opa nao ’t bakkes op ’t einj, voetballe op de dreesjpool of taege de paort van de sjuur van Frits van Lowieke Dreese. Kwab den Uul dae goof dich waal ins eine babbelaer, es ver temminste langs Frits van de Not kaome, want dae deeg net of er dich de warre aaf wol snieje. Of die auw tant  van Fransse die gans allein in ’t veld woonde in dat wit hoes op Gaöl aan. Jaore dachte veer dat ’t ein heks waor. Veer möste dao ummer langs es ver nao ’t weike möste wo ver greunte en graas houwe staon veur de knien.

Es de sjwal oetwaor snel heivis en nao de boere , bie de Maös aerappele raape verrekes voore en wiemere plukke. Bie Pieke van de Til krwatte oetdunne en bie Fritske van Cobbe de keu mèllike. En es ich nog tiet euver how piele raape bie Harie de Link, die sjoote mit piel en baog op ein doel en ich ging dao de piele teruk haole, ich stong dan achter eine baom en es eine piel in de rwas kaom dan mös ich roope “Sjampo Dot “ wie Harie de Link dao aan kaom weit ich nog ummer neet. Ich kreeg dao dan ein paar kwartjes veur, die ich geliek weer omzat veur sjlok in ’t winkelke van Tiese.

Sondessmörreges bie Sjefke op de dreesjpool deege ze sjraöme , dan woor ein streep in de drèk getrokke en dao ginge ze dan mit ènkel cente op gwaje ,degeene dae ’t korste bie de streep how gegwajt dae mog de inzat houwte en es ’t slech waer waor ginge ze bènne doppe of kaarte. Es zich eine verbrènt how dan kös ste de pien laote wegbaeje bie Neske van Collard of es eine slech laog ein noveen in de kapel , de klok woor dan geloejt en dan kaome de luuj van Catsop baeje.

Vaöl van die figuure höbbe ’t veld al mötte ruime , gestörreve of verhoes nao “t bejaardehoes of weuning. Kwab den Uul, Fritske van Cobbe, Neske Collard, Toon Van Es, Hoebaer mit dat houte bein , Knabbes dae de gezèt ronjdbrach, es dae ein paar nuuj klante de bie kreeg zag er, ich höb weer ein paar abeneese de bie. Theu en Merie op ’t eintj, Theuke de geruisloze , Snöts Huubke en Maj de Tant bie oos naeve, mien Paat.

Catsop die, zwalang es ich weit mit vastelaovend ummer in de optoch höbbe mitgedaon.

Zellefs de mam haet Catsop verlaote en is in Aelse gaon woone. 25 jaor oet Catsop weg ,wat eine tiet liek ’t mèr al die herrineringe nump mich geine aaf nwats mjèr. Die boereloch ruuk ich nog ummer gair dat merk ich es ich langs de wakkel laop de Hoos in, dao staeke ein kud keu euver van Janje Claessen dae vreug aan mich en Pierre höb ste dich verlaope  ich zèk neet verlaope .

Ich dach bie michzelf wat is ’t toch sjwan ins Catsoppenair te zin.

Pierre van Lies van Tjeu van  Tien van ’t einhèndje

In 't Sieckendael, Catsop (Foto Pierre Reubsaet)

Luchtfoto van Catsop (collectie Catsop Van Vreuger | Guus Smeets)